Ginpanindugan sang retired judge kag Philippine Charity Sweepstakes Office (PCSO) Chairperson Felix Reyes nga wala siya sang kahilabtanan sa tanan nga isyu nga ginahaboy sa iya sang missing-sabungero whistleblower nga si Alyas Totoy ukon Julie “Dondon” Patidongan.
Sa statement nga ginpaguwa sang nasambit nga opisyal kahapon nga adlaw (Hulyo 9), iya ginpanginwala ang tanan nga alegasyon nga ginhimo ni Alyas Totoy, kadungan sang iya kahanda nga magkooperar sa anuman nga imbestigasyon sa nasambit nga isyu.
Una nga ginkilala ni Patidongan ang retirado nga judge nga ginaalegar naulamid sa case-fixing para sa business tycoon nga si Atong Ang.
Ginpahayag nga nagbiyahe man ini sa luwas sang pungsod sang pila ka beses upod ang pila ka mga piskal kag mga kaupod nga hukom agud himuon ang case-fixing.
Apang ginpanindugan ni Reyes nga kabutigan ini tanan.
Ginpanindugan ni Reyes nga kun indi ma-representar kag mapamatud-an ni Patidongan ang iya mga akusasyon, mas maayo nga maghipos lang ini.
Kadungan sini, ginhatagan man sang otoridad sang retirado nga huwes ang Bureau of Immigration nga buksan ang mga rekord sang tagsa ka international travel nga iya nahimo humalin sang nagretiro siya sa judiciary sang 2021.
Sigurado suno sa iya nga mapamatud-an sang records nga indi matuod ang tanan nga ginapahayag ni Alyas Totoy.
Ginkwestyon man sang opisyal ang timing sang pagpaguwa sang mga alegasyon nga suno sa iya naglupok isa ka adlaw matapos siya nag-file sang application para sa posisyon sang Ombudsman.
Ginhatagan pagtamod ni Reyes nga handa siya sa mga imbestigasyon nga pagahimuon sang anuman nga ahensya sang gobyerno nga mahimo maghatag kasanag sa tanan nga mga alegasyon kag agud tinluan ang ngalan sang judiciary kag prosecution service sa amo nga mga akusasyon.
