(UPDATE) – Ginbalik-balik sang mga suspetsado nga sakay sa Honda TMX nagaduag pula ang lugar nga masami ginapadulongan ni anay Barangay Kapitan Nelson Daluyo sang Brgy. Bayuyan, antes ang natabo nga pagpangluthang-patay sa iya sa Barangay Sto. Niño, lunsay sa banwa sang President Roxas, Capiz.
Ini ang ginpahayag ni PCpt. Alfred De Leon, hepe sang President Roxas MPS, sang mainterview sang Bombo Radyo.
Suno diri nga ba-se sa panaysayon sang indi na paghingadlan nga mga witnesses, aga sang Mayo 24 nasiplatan na ang amu nga riding in tandem nga nagpadulong sa payag sang biktima sa Sitio Nabuyong nga sakup sang Barangay Bayuyan, sa amu nga banwa, kag nagbalik pagkahapon, apang napaslawan ang mga ini bangud wala makapadulong ang anay Punong Barangay sa iya nga kamaisan.
Wala man ini mahatagan sang pagtamod sang mga kapulisan, bangud wala makapalab-ot ang mga residente sang impormasyon nga may mga makaduluda nga persona sakay sa motorsiklo ang yara sa amu nga lugar.
Sandig sa deskripsiyon sang mga saksi sa mga suspek, nagasuksok sang helmet ang driver kag naka-jacket nagaduag itom, samtang bonnet nagaduag man itom ang suksok sang gunman kag naka-jacket nagaduag brown nga may pagka-patig, may kataason nga ginabulubanta 5’6 tubtob 5’7 ang duha ka mga suspek kag medyo maputi ang supat sang mga ini.
Nagaguwa man sa follow-up investigation sang mga kapulisan nga nagdiresto pasaka, nga may posibilidad nagpaguwa sa banwa sang Pilar ukon banwa nga sakup sang Iloilo ang direksyon sang mga suspetsado, bangud wala na ang mga ini nag-liko matapos ang pagpangluthang.
Nagapangayo man sang kooperasyon ang mga kapulisan sa mga barangay officials sang kaiping nga barangay sang Sto. Niño, agud madasig nga matumod ang riding in tandem suspects sa krimen.
May yara man sang ginasundan nga mga anguulo ang kapulisan sa krimen, ini amu ang may posibilidad sa duta, pulitika kag ang natabo sang tuig 2015 nga pagpanglagas sang naka-motorsiklo sa anay Punong Barangay.
Sa karon, ginarespeto sang mga kapulisan ang pagpangasubo sang pamilya sang biktima, samtang padayon ang ila imbestigasyon sa nasambit nga krimen.
