ROXAS CITY – Nadakpan ang duha ka persona pinaagi sa hotpursuit operation nga ginpatigayon sang Ivisan Municipal Police Station matapos nga ginluthang sang suspek ang isa ka lalaki nga nagamaneho sang van sa Barangay Poblacion Sur, Ivisan Capiz.
Ginkilala ang mga arestado nga sanday Reygan Fuentes Tolentino, 37-anyos kag Mon Niol Villarisco, 33-anyos lunsay mga residente sang Brgy Agustin Navarra sang nasambit nga banwa.
Sandig sa imbestigasyon sang Ivisan MPS, takna 7:45 sang gab-I, Sabado , samtang ginasubay ni Karl Edgar Borbe ang dalanon nagikan sa Altavas, Aklan padulong sa amu nga banwa sakay sa ginamaneho nga van.
Pag-abot sa ginluntaran sang insidente hinali ini ginluthang sang riding in tandem gamit ang ginapatihan cal .45 pistol.
Bangud sini, nag-angkon sang menor nga pilas sa nawala nga abaga ang biktima nga madasig naman ginrespondehan sang Ivisan Rescue Unit.
Narekober sa lugar ang isa ka empty shell sang nasambit nga armas luthang.
Madasig naman nga nagpalagyo ang mga suspek padulong sa Brgy Agmalobo sakay sa Honda Click nga motorsiklo nagaduag pula apang takna 10:40 sang gab-I, natigayon nga nadakpan ang mga suspek sa ginpasangkad nga hot pursuit operation sang mga kapulisan.
Sa karon, natalana nga pasakaan sang nagakaigo nga panumbungon ang mga arestado.
