ROXAS CITY – Ginakulang na sang mga doktor, nurses kag nursing attendant ang Roxas Memorial Provincial Hospital ukon RMPH nga magatatap sa mga pasyente partikular na sa mga COVID-19 patient.
Ini ang ginkompirmar ni Dr. Ramon Alex T. Nolasco, Chief of Hospital sang RMPH sang mainterview sang Bombo Radyo.
Suno kay Nolasco nga nagapatigayon na sila sang “emergency hiring” para sa mga luyag mag-apply sa nasambit nga ospital.
Ginpahayag ni Nolasco nga apektado ang operasyon sang amo nga pasilidad bangud kulang ang mga doktor kag nurses sa amo nga ospital rason nga wala sila nagabaton sang mga non-COVID-19 patients kag gina-refer na lamang nila ang mga ini sa mga district hospitals sa probinsya.
Ini bangud ang iban nga mga doktor kag nurses ang nagapaidalom sa quarantine, nag-resign kag ang iban nagahulat sang ila nga swab test results.
Apang, ginpasalig sini nga magabalik man sa normal ang operasyon sang amo nga ospital sa masunod nga semana sa tion nga magtakop na ang quarantine period sang mga doktor kag nurses.
Gin-athag ni Nolasco nga nag resign ang mga ini bangud sa ila tagsa ka mga personal nga rason kag indi sa ila manubo nga sweldo.
Dugang pa sini nga nagakinahanglan ang amo nga ospital sang dugang nga mga doktor kag nurses partikular na sa COVID ward sang amo nga ospital.
Sa karon, padayon ang ila pagbaton sang mga aplikante kapareho sang doktor kag nurses nga luyag mag-apply sa nasambitan nga ospital.
