ROXAS CITY – Nagpatigayon sang inspeksyon ang katapo sang Roxas City Fire Station kaupod ang katapo man sang kapulisan sang syudad angut sa ila mga nabaton nga report nga may yara sang mga indibidwal nga nagabaligya sa gihapon sang tingi-tingi nga gasolina sa higad sang karsada.
Suno kay SFO3 Selvino Ross Jr., PIO sang Roxas City Fire Station (RCFS), nagkoordinar sa ila ang Roxas City PNP sang Miyerkules agud maaksyunan ang report sang mga concerned citizens angut sa iligal nga pagbaligya sang gasolina.
Ginpadulungan nila ang 2 ka mga lugar nga ginreport kalakip ang Inzo Arnaldo kag Rizal St. apang wala nila ini nadakpan sa akto nga nagabaligya kag karton na lamang nga may sulat sang presyo sang gasolina ang ila nakit-an.
Posible suno diri nga may nagapahibalo sa mga nagabaligya agud makapanghimos gilayon kun may igapatigayon sila nga inspeksyon rason nga indi ang mga ini maaktuhan.
Aminado ang Fire Officer nga madamo sa gihapon ang nagabaligya sang tingi-tingi nga gasolina sa syudad, apang suno diri wala sila gapabaya pag-abot sa monitoring kag wala man sila nagauntat paandam sa mga ini.
