ROXAS CITY, CAPIZ- Dako ang pagpasalamat sang Roxas City Government, bangud madinalag-on nga nalumpawasan ang pagpanghangkat nga dala sang Bagyo Tino sa mga pumuluyo.
Sa interview sang Bombo Radyo kay Mr. Melvin Galagate, Head sang Roxas City Communications Group, iya ginpahayag nga antes pa man ang pag-igo sang bagyo sa syudad, hugot na ang ila nga ginapatigayon nga mga safety measures.
Nag-angkon sang pila ka serye sang paghinun-anon ang Local Disaster Risk Reduction and Management Council (LDRRMC) kaupod ang Roxas City Government kag iban pa nga mga ahensya.
Sa nasambit nga pagsinapol, gin-istoryahan ang tanan nga mga butang nga dapat nila himuon, antes, sa tion, kag pagkatapos sang Bagyo Tino.
Suno kay Galagate, ginsiling sang alkalde sang syudad nga mas maayo nga paghimo sang mga panagang kaysa sa magbulong (‘Prevention is better than cure’) rason nga wala gid ini untat sa pag-monitor sa lakat sang panahon kag sa mga pumuluyo nga iya nasakupan.
Madamo sang mga evacuation centers ang ginpahamtang sang syudad kun sa diin nga gin-akuparan ini sang mga pumuluyo nga indi lamang halin sa mga coastal kag flooded areas sang syudad, kundi pati man mismo ang mga may magagmay nga mga puluy-an.
Samtang yara sa evacuation centers, ginsiguro sang City Government nga indi magutuman ang mga evacuees pamaagi man sa pagpanagtag sang mga food packs. Nagbulig man ang tagsa ka mga barangay officials sa paghatag sang mga hot meals kag iban pa nga pagkaon.
Nahibaluan nga nag-igo ang bagyo sa probinsya sang Capiz sang Martes nga adlaw, Nobyembre 4 sa diin nga ginpaidalom ini sa Tropical Cyclone Wind Signal No. 4.
Dalayon naman nga nakaguwa ang bagyo sa bug-os nga probinsya sang las 8:00 sang aga sang Myerkules nga adlaw, Nobyembre 5 base sa weather forecast sang Philippine Atmospheric, Geophysical and Astronomical Service Administration (PAGASA).
Sa pihak nga bahin, nagapasalamat naman ang Roxas City Government sa tanan nga mga pumuluyo sa kooperasyon nga ginpakita sang tion sang kalamidad kag sa mga frontliners nga aktibo sa paghatag sang serbisyo publiko para sa mga nagakinahanglan sang bulig sa diin nga nagresulta ang amo nga mga tikang sang madinalag-on nga paglampuwas sa nasambit nga bagyo.
Interviewed by Bombo Francis Biñas
