ROXAS CITY, CAPIZ- Nagapasalamat sa tagsa ka mga pumuluyo sang syudad sang Roxas, ang Roxas City Government sa kooperasyon nga ginpakita sa tion sang pag-igo sang Bagyo Opong.
Sa interview sang Bombo Radyo kay Melvin Galagate, Information Officer III kag Head sang Roxas City Information Division, iya ginpahayag nga bangud sa kooperasyon sang tagsa-tagsa, luwas nga nalampuwasan ang amo nga bagyo nga nag-igo sa syudad.
Suno kay Galagate, natigayon naman subong nga adlaw, Setyembre 28 nga magbalik sa normal nga operasyon ang palibot sang syudad.
Pahayag pa nya, sa pihak nga wala na sang bagyo, may yara sang gamay nga halit nga ginbilin si Bagyo Opong, sa diin nga nagdangat sa P15,000 nga balor ang nagguba nga fish cage structure sa Cadimahan River, pulo (10) ka ektarya sang uyapad nga may mga agri-products nga alanihon ang ginsul-ob sang baha sa Barangay Bolo, kag pulo (10) ka ektarya man sang ulumhan ang naapektuhan sa Barangay Bago sandig sa inisyal nga datos nga nakuha sang ila nga talatapan.
Nahibaluan nga nagdangat man sa 1,444 ka mga pamilya ukohn kabaylo sang 5,274 ka mga indibidwal ang nag-evacuate sa 138 tanan ka mga evacuation centers sang tion nga nag-igo ang amo nga bagyo.
Dugang pa sang natungdan, padayon sa gihapon nga ginaberipika sang City Disaster Risk Reduction ang Management Council agud nga matumod ang kabilugan nga halit nga ginbilin sang amo nga bagyo sa syudad.
Interviewed by Bombo Francis Biñas and Bombo Sunnie Mae Batencila
