ROXAS CITY – Luyag sa karon sang gobyerno sang siyudad nga masolusyunan ang madata nga kaso sang balatian nga Human Immunodeficiency Virus-Acquired Immunodeficiency Syndrome (HIV-AIDS) sa siyudad sang Roxas.
Ang nasambit nga problema ang kabahin man sa gintalakay sa sesyon sang Sangguniang Panlungsod.
Sa nasambit nga sesyon, ginpresentar ni City Health Officer Lory Cahilog ang pinakaulihi nga datos nga napagkit sang talatapan sa amo nga balatian.
Suno kay Cahilog sandig sa ila pinakaulihi nga rekord, nagdangat na sa 241 ang kaso sang persons living with HIV sa probinsiya kun sa diin 92 diri ang napagkit sa siyudad sang Roxas.
Sa nasambit nga numero suno kay Cahilog, 222 diri ang mga kalalakinhan samtang 19 naman ang mga kababainhan.
Kadamuan suno kay Cahilog sa biktima sang amo nga balatian ang lunsay mga young professionals.
Luyag karon sang gobyerno sang siyudad nga mapasangkad pa ang ila kampanya agud madula ang stigma sa nasambit nga balatian kag mapahangop nga indi ini sang makalalaton kun wala sang sexual-interaction sa isa ka tawo nga infected sang nasambit nga virus.
Ginklaro man ni Cahilog nga may yara sa karon sang ginahatag nga anti-retroviral medicine ang ila talatapan agud mapahagan-hagan ang epekto sang balatian nga HIV-AIDS.
Bukas man suno sa iya ang ila talatapan para sa mga luyag nga magpadulong agud mahibaluan ang ila estado pinaagi sa HIV-testing nga magapabilin nga confidential.
