ROXAS CITY-Ginkompirmar ni Roxas City Mayor Ronnie Dadivas nga nagpositibo sa Coronavirus Disease ukon COVID-19 si City Veterinary Head Dr. Roberto Dante Corros.
Ini ang ginpahayag ni Dadivas sang mainterview sang Bombo Radyo.
Suno kay Dadivas nga positibo ang resulta sang swab test ni Corros nga ginapatihan nga gintunaan sang iya kamatayon.
Dugang pa sini nga may yara sang ginasupreher nga Diabetes, Hypertension kag heart problem ang nasambit nga veterinarian.
Gindala ini sa ospital sang tinalikdan nga Miyerkules kag gin-admit bangod nagmasakit kag ginhilanat.
Kasunod sini, temporaryo nga ginpasarado ang City Veterinary Office kag ginpaidalom sa quarantine kag ginkuhaan sang swab test ang mga empleyado kag naka-close contact ni Corros.
Samtang, ginpahayag man ni Dadivas nga lauman nga magasugod na subong nga bulan sang Setyembre ang RT-PCR laboratory sang Roxas City.
Mahibaluan nga ginahulat na lamang nila ang team sang Department of Health nga magapatigayon sang inspeksyon kag magatsekyar sang mga equipment sang amo nga laboratoryo.
Magluwas diri nagapaidalom naman sa paghanas ang mga medical personnels kapareho sang medtech kag medical technologist nga ginpahamtang sa nasambit nga pasilidad.
Sa tion nga makapasar ini suno sa alkalde pagahatagan na ini sang license to operate agud mapasangkad pa ang testing capacity kag makaserbisyo sa publiko.
Dugang pa sini nga naglab-ot sa 100 ang masarangan sang nasambit nga laboratoryo kun sa diin ginakabig ni Dadivas nga daku nga bulig ini sa mga Capizeño
