ROXAS CITY – May yara na sang ginahawidan nga 84 tanan ka mga pangalan sang ginapahayag drug personalities ang mga kapulisan sa siyudad sang Roxas.
Suno kay Police Superintendent Dante Tayco, hepe sang Roxas City PNP, ang nasambit nga mga pangalan ang gikan sa mga Drug Drop Boxes nga ila ginpahamtang sa magkatuhay nga mga kabaranggayan sa siyudad angut sa Oplan Tokhang Reboot sang mga kapulisan.
Suno kay Tayco, 11 sa 84 ka mga pangalan ang dati na nga mga drug surrenderers samtang 73 naman diri ang lunsay mga newly identified drug personalities.
Gin-athag naman ni Tayco nga wala sang nalakip nga mga pangalan sang barangay officals sa mga drug drop boxes.
Suno pa kay Tayco, iga-validate pa ini sang mga kapulisan pinaagi man sa pagpakig-angut sa Barangay Anti-Drugs Abuse Council (BADAC) sa mga kabaranggayan sa siyudad.
Liwat naman nagpanawagan si Tayco sa publiko, nga indi magpangduha-duha sa paghulog sang pangalan nga ila ginapatihan nagaduso sa gihapon sang ilegal nga droga bilang suporta sa masusog nga kampanya kontra droga sang kapulisan.
