ROXAS CITY – Tatlo ka mga motorsiklo ang yara na karon sa kustodiya sang Roxas City Police Station matapos nga nagpatigayon sang inspeksyon ang mga katapo sang Highway Patrol Group, Roxas City PNP kag Capiz Provincial Crime Laboratory sa mga junkshops kag mga motor repair shops kasunod sang asud-asod nga insidente sang motornapping sa siyudad.
Suno kay Police Master Sergeant Ramil Arcangeles, tagpamaba sang Roxas City PNP, ila nga natukiban nga may yara sang mga motor shops nga nakahibalo magtamper sang mga chasis number kag engine number rason nga may yara sang mga motorsiklo nga wala nakarehistro sa Land Transportation Office.
Bangud diri, ginpanugyanan nila ang mga motor repair shops nga indi ini paghimu-on bangud mahimo sila mapasakaan sang panumbungon.
Samtang may yara naman sang mga motorsiklo nga gintsekyar sang mga katapo sang HPG ang chasis number apang wala sang ginpakita ang mga tag-iya rason nga ila ini nga ginkompiskar.
Apang sa tion nga mapresentar sang tag-iya ang ila nga papeles mahimo naman ini nga mabalik sa ila.
Bangud diri, indi mag-untat ang mga kapulisan sa pagpatigayon sang inspeksyon sa mga motor repair shops kag mga junk shops agud matapna ang nagakahinabo nga motornapping kag pagpangawat sang mga spare parts sang mga motorsiklo.
Matandaan nga humalin sang Pebrero 19, sini nga tuig, may yara na sang anum ka mga motorsiklo ang gin-motornap kag duha pa lamang diri ang narekober apang ang apat ang padayon pa nga ginapangita.
Sa karon nagtukod sang separado nga hubon ang mga kapulisan nga magatutok sa nagakahinabo nga motornapping sa syudad sang Roxas.
