Nagpatigayon ang Roxas City LGU, Department of Public Works and Highways (DPWH), kag Department of Labor and Employment (DOLE) sa isa ka coordination meeting agud preparahan ang implementasyon sang Oplan Kontra Baha sa syudad.
Ginpatigayon ang meeting pinaagi sa partisipasyon sang City Engineer’s Office kag Public Employment Service Office (PESO), kun sa diin ginhisugtan ang tagsa ka responsibilidad sang mga ahensya para sa episyente nga pagpatuman sang programa nga nagatuyo nga mapahagan-hagan ang epekto sang pagbaha sa Roxas City.
Suno sa mga opisyal, mangin kabahin sang implementasyon ang pagdeploy sang mga benepisyaryo sang DOLE-TUPAD nga magabulig sa pagpanglimpyo kag pagpanghawan sang mga waterways kag creek agud mapahapsay ang pag-agos sang tubig kag malikawan ang pagbara nga mahimo magresulta sa pagbaha.
Pinaagi sa tikang sang local government kag mga national agency, ginapaabot nga mas mapabakod ang kampanya batok sa baha kag maprotektahan ang komunidad ilabi na sa tion sang masunod nga mga pag-ulan.
