Nagpaandam ang Roxas Component City Police Station batok sa love scam duha ka adlaw antes ang valentine’s day.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas Component City Police Station, iya ginpahayag nga ang masami nga gina-ubra sang love scammer amo ang paggamit sang matam-is nga tinaga, pagpeke sang impormasyon ukon account kag pagpangayo sang kwarta pinaagi sa pagbinutig kag sa ulihi nagadula lang bangud nakuha na ang kwarta.
Suno kay Arcangeles , mahimo nga mangin mabinantayon sa paghatag sang personal nga impormasyon kag indi dali-dali nga magpadala ukon magpainto ilabi na kun nakilala lamang online.
Pahayag niya, kadam-an sa mga biktima sang love scammer amo ang mga indibidwal nga naga pangita sang maistorya sa social media ukon sa mga dating applications.
Ginahingyo sang kapulisan ang publiko nga mag-report gilayon sa Roxas Component City Police Station kun may persona nga nagapangayo sang pagkabutang ukon kwarta online.
