Russian President Vladimir Putin, gin-ako nga sila ang sa likod sang pagpatibusok sang Azerbaijan jet nga nagpatay sang 38 ka tawo

Ginkumpirmar ni Russian President Vladimir Putin nga sila ang yara sa likod sang pagpatumba sang Azerbaijani jetliner sang Disyembre nga nagpatay sang 38 ka tawo.

Suno sa Russian President, ginlansar ang ila air defenses agud targeton ang Ukrainian drone apang ini ang naglupok malapit sa eroplano sang Azerbaijani Airlines.

Naghalin ini sa Baku, Azerbaijan kag natalana nga maghugpa sa Chechnya, Russia, sang Disyembre 25, 2024 sang natabo ang insidente.

Ginhimo ni Putin ang pag-ako sa tion sang iya pagsinapol kay Azerbaijan President Ilham Aliyev sa Dushanbe, Tajikistan.

Nagpasalig naman si Putin nga silutan niya ang mga yara sa likod sang pagpatumba sang eroplano kag magahatag man sang bulig sa mga biktima.