ROXAS CITY – Nagpanindugan ang pamunuan sang San Ramon Birthing Center nga wala sang diskriminasyon nga natabo sa ila pagbalibad nga mapaanak sa ila talatapan ang 30 anyos nga ginang nga residente sang Sitio Luyo, Barangay Culasi, Roxas City.
Suno kay Eusebio Alcazar, administrator sang nasambit nga talatapan, wala nila gina-diskriminar kun halin sa Barangay Culasi ang isa ka pasyente.
Ginpahayag sini nga sa pagkamatuod, ila gid ginpasulod ang nasambit nga babaye agud akomodahon.
Apang sang ila gin-usisa, diri natukiban nga wala sang rekord sa ila talatapan ang babaye kag wala man ini sang may mahatag nga health certificate.
Wala suno diri sang diskriminasyon sa mga taga-Culasi apang isa lamang sa ginapangita nila agud akomodahon ang isa ka pasyente amo nga health certificate.
Suno kay Alcazar, makabig nga ‘high risk’ ang ginang bangud ini na ang iya ika-lima nga pag-anak gani nagakadapat gid ini nga ma-refer sa ospital.
Sang ila na nga i-refer sa ospital ang ginang, nagpamabalibad naman sila bangud nagpanindugan man sila nga magapauli na lamang.
Panindugan sini nga wala gid nila gin-diskriminar ang ginang sang ila nahibaluan nga residente ini sang Barangay Culasi bangud sa pagkamatuod, ila pa ini nga ginpasulod kag ginpahanugutan nga mag-ihi sa ila nga comfort room.
