Gintalana sang Sandiganbayan 3rd Division ang 10 ka adlaw nga bail hearing umpisa Abril 6 para sa kaso sang malversation batok kay Former Senador Ramon “Bong” Revilla Jr., Former Bulacan First District official Brice Hernandez, kag iban pa nga mga akusado may kaangtanan sa gin-alegar P92.8 million nga ghost flood control project sa Pandillacan, Bulacan.
Hiwaton ang hearing sa aga kag hapon, kag ginalauman nga magalawig tubtob sa Abril 24.
Suno sa korte, katuyuan sang bail hearing nga usisaon kun may yara sang bastante nga ebidensya agud tugutan ang provisional release sang akusado samtang nagapadayon ang trial.
Kasunod sini, ang trial proper ang natalana man nga magasugod sa Abril 7 sa Sandiganbayan 4th Division, sa diin magapresentar ang Ombudsman sang 56 ka prosecution witnesses nga magapamatuod sang ginaalegar nga mga maanomaliya.
Ini nga kaso isa sa pinakadako nga graft kag malversation proceedings subong nga tuig, nga ginabantayan sang publiko bangud sa kabug-aton sang mga akusasyon kag sa kadamuon sang mga testigo.
Kun mapamatud-an nga guilty, mahimo nga magapangatubang sang mabug-at nga penalidad ang akusado lakip na ang pagkapreso kag pagbayad sang danyos.
Sa subong, hugot nga ginapanginwala ni Revilla kag sang iya kampo ang mga alegasyon, samtang nagpakita naman sang pagsalig ang Ombudsman sa ila mga ebidensya kag witnesses.
Samtang, sa bulan sang Abril, magasugod ang intensive trial nga ginalauman nga magabuyagyag sang dugang nga detalye tuhoy sa ginaalegar ghost project nga isa sa pinakadaku nga kaso sang corruption nga gina-atubang sang isa ka anay senador sa kasaysayan sang pungsod.
