ROXAS CITY – Ginaduso sang Sangguniang Bayan sang banwa sang Sigma ang pagdihon sang resolusyon agud mahatagan sang pasidungog ang duha ka mga frontliners nga napatay matapos ang nagluntad nga pagbungguanay sang ambulansya sang Sigma Emergency Response Team kag Montero Sports sa National Highway sa Barangay Ondoy, Ivisan Capiz.
Ginpahayag ni Sangguniang Bayan Member Esperidion “Speed” Pelaez nga nabatyagan gid sini ang kasakit kag kasubo nga gindangatan sang duha ka mga responders sang Sigma Response Team nga sanday Darius Yap kag Ernie Fulgencio nga napatay samtang nagapanerbisyo sa nasambit nga banwa.
Suno kay Pelaez nga kabahin ini sang pagkilala sang banwa sa ginhimo nga baganihan sang duha ka mga napatay.
Gindugang pa ni Pelaez nga pinaagi sini makita kag maapresyar man ang dedikasyon nga ginahimo sang nasambit nga mga frontliners nga ginahatag ang kabuhi agud makaserbisyo.
Magluwas diri, ginpahayag man ni Pelaez nga naghatag man sang bulig ang lokal nga gobyerno sang Sigma sa duha ka mga frontliners.
Samtang yara naman sa hilway nga kondisyon si John Rey Castillon, ang isa pa ka frontliner nga sakay sa nasambit nga ambulansya nga kalakip sa mga napilasan.
