ROXAS CITY – Ginalauman na ni SB Member Eve de Tomas Cedullo nga wala ini sang makuha nga committee chairmanship sa pagsugod sang sesyon sang Sangguniang Bayan sa banwa sang Cuartero.
Suno kay Cedullo, natalupangdan na sini nga tanan nga opisyales ang may ginatamdan na nga kodigo sa diin ginapahayag nakalista ang napilian nga miyembro sang komitiba magluwas sa iya kag Sangguniang Kabataan Federation President.
Wala naman ini sang mahimo kun wala siya sang nahiwaran nga komitiba bangud ginpili kag desisyon ini sang mayorya.
Nagapati si Cedullo nga ‘power tripping’ ang natabo kag nag-ugat ang paghingabot sa iya sang nagpasaka ini sang kaso sa Office of the Ombudsman sang Abril 2023 batok sa mga opisyales sang LGU-Cuartero bangud sa ginapahayag pagdumili sa iya nga magpost sang video sang iya priviledged speech sa social media kag paglapas sa constitutional rights niya bilang isa ka indibidwal.
Matandaan sang Mayo 2023, nadiskubrehan man ni SB Cedullo ang ginaalegar overpriced nga pagpresyo sang mga heavy equipment nga ila pagabaklon, pinaagi sa pag-loan sang P50-M.
Dugang pa ni Cedullo nga magapadayon ang iya malimpyo kag matuod nga pagserbisyo sa mga pumuluyo apisar naga-isahanon ini sa kawsa.
