Ginpunto sang isa ka international law expert nga dapat desisyunan sa gihapon sang Korte Suprema ang mga petisyon nga nagakwestiyon sa legalidad sang pag-aresto kay anay Pangulong Rodrigo Duterte sa pihak sang partial mootness sini ukon apisar magresulta lang sa wala bangud yara na sa kustodiya sang International Court ang anay Pangulo.
Suno sa international law expert nga si Atty. Rodel Taton, dapat nga magdesisyon sa gihapon ang Mataas nga Hukuman sa nasambit nga kaso bangud ini ang nahanungod sa soberaniya kag independensiya sang Pilipinas, apisar may pagpasilabot gikan sa outside forces kasubong sang international organization ukon estado.
Aminado man ini nga may posibilidad sang mootness ukon wala sang epekto ang mangin desisyon sang korte, apang kinahanglan sa gihapon suno diri nga lantawon bangud ini ang isa ka issue sang national concern.
Sa pihak sang posibilidad nga magresulta bilang moot ang hinyo sang kampo ni Duterte para sa Temporary Restraining Order (TRO) kag Habeas Corpus, ginpahayag ni Atty. Taton nga may ara sa gihapon sang exceptions sa mootness rule sang Korte Suprema.
Suno pa kay Taton, sa pila ka mga kahigayunan, gindesisyunan sang Korte Suprema ang mga kaso nga may kahilabtanan sa pungsod agud maghatag sang legal guidance sa mga henerasyon sa palaabuton.
Pila sa mga exceptions sa mootness rule amu kun ang kaso ang may kahilabtanan sa isyu sang tuman nga interest sang publiko, kun ang kaso ang may kahilabtanan sa seryoso nga paglapas sang Konstitusyon, kun ang kaso ang mahimo nga maliwat apang mabudlay nga pagatun-an kag kun ang kaso ang nagakinahanglan nga maghimo sang mga legal nga prinsipyo agud magiyahan ang publiko, legal profession kag ang hudikatura.
Matandaan, yara sa tatlo ka petisyon ang gin-file sa Korte Suprema nga nagakwestiyon sa pag-aresto sa anay Pangulo.
Una amu ang gin-file ni Aty. Israelito Torreon sang adlaw nga gin-aresto ang anay Pangulo, nga nagahinyo nga ideklarar nga unconsititutionl ang kooperasyon sang gobyerno sang Pilipinas sa ICC.
Ang ikaduha kag ikatatlo naman amu ang separado nga gin-file sang mga anak ni Duterte nga sanday Veronica kag Sebastian Duterte nga pareho nagahinyo sang writ of habeas corpus agud balabagan ang mga otoridad nga iatubang ang anay Pangulo kag ipaathag ang rason sang pag-aresto sa iya.
