ROXAS CITY – Gin-usisa ni Board Member Matt Hachuela si Board Member Thea Faith Reyes kasunod sang diskurso-pribiliheyo ni Reyes sa sesyon sang Sangguniang Panlalawigan kun sa diin nahinambit sini ang pangalan ni provincial administrator Edwin Monares.
Ginpamangkot ni Hachuela si Reyes kun ngaman nakahambal ini nga may yara sang nagakahinabo nga basulay sa scholarship program sang gobyerno-probinsiyal.
Suno naman kay Reyes nga may binasulay nga nagakahinabo bangud sa baylo nga solusyunan na lamang ang problema, kasubong nagapangita pa sang ‘excuse’ ukon rason agud indi mabaydan ang mga scholars sa idalom sang nasambit nga programa.
Gindugang pa ni Reyes nga kasubong ginapaguwa ni Monares nga ang partikular nga rason nga indi mabaydan sang gobyerno-probinsiyal ang mga scholars bangud wala sang may ginbilin nga dokumento ang nakaligad nga administrasyon.
Ginpamangkot ni Hachuela si Reyes bilang ini ang chairman sang Committee on Education kun matuod nga wala sang may ginbilin ang nakaligad nga administrasyon nga mga dokumento kag records sang nasambit nga programa.
Diri kag ginklaro ni Reyes nga yara ang records sang scholarship program.
Sang ginpamangkot naman ni Hachuela si Reyes kun ‘butigon’ si Monares bangud sa kasubong nagasalungkaki nga pahayag, wala ini direkta nga ginsabat ni Reyes bangud wala na sang iban nga makasabat sini suno sa opisyal kundi si Monares man mismo nga para sa iya nagahimo-himo lamang sang istorya.
Kasunod sini gin-usisa ni Hachuela si Monares kun ano na ang matuod-tuod nga estado sang scholarship program sang gobyerno-probinsiyal.
Kag bangud wala ini direkta nga ginasabat sang administrador, kasubong nagtaas ang tingog ni Hachuela kag direkta nga ginpamangkot si Monares kun mabaydan pa gidman ang scholarship ukon indi.
Sabat naman ni Monares nga pagabaydan ini sang gobyerno-probinsiyal apang indi sini mapat-od kun pila ang kantidad nga igabayad tagsa ka scholars sa idalom sang nasambit nga programa.
