ROXAS CITY – Maswerte nga wala naglupok ang armas luthang matapos ang ginaalegar nga pagpangluthang sang isa ka security guard sa kaangay man sini nga security guard sa Pueblo Market Bldg., Pueblo de Panay, Barangay Lawa-an, Roxas City.
Ginkilala ang biktima nga si Fermin Ressurecion, 34-anyos, residente sang Barangay Daan Sur, Tapaz, Capiz samtang ang ginapahayag suspek ang ginkilala nga si Sergio Isiderio, yara sa legal nga pang-edaron kag residente sang Barangay Bilao, Sapian, Capiz kag lunsay nadestino sa nasambit nga lugar.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang ang biktima yara sa nasambit nga establisyemento may nagluntad nga pagbinaisay sa tunga nila sang suspek kung sa diin nag-abot sa punto nga gintayaan kag ginluthang sang ika-duha ka beses gamit ang .38 caliber nga armas luthang.
Suno kay Patrolman Rodnel Bernadas beat patrol sa lugar, wala ini nakabati sang lupok sang armas luthang.
Matapos ang insidente, madasig nga nagpalagyo ang suspek sakay ang kaugalingon sini nga tricycle.
Mahibaluan nga ginalantaw nga rason ang indi pag-intindihanay kag madugay na nga hiligut-anon.
Sa karun, padayon nga nagapatigayon sang hot pursuit operation ang mga otoridad agud matigayon nga mdakpan ang nasambit nga suspetsado.
