Ginkumpirmar ni Senate Blue Ribbon Committee Chairperson Panfilo “Ping” Lacson nga magabalik sa Enero 19 ang hearing sa senado sa ginaalegar maanomaliya sa flood control projects.
Suno kay Lacson, magasugod ini sa ala una sang hapon. Sa diin, paga-istoryahan sa hearing ang gina-alegar nga pag-withdraw sang mga anay opisyal sang Department of Public Works and Highways (DPWH)-Bulacan, Brice Hernandez kag Henry Alcantara sa ila mga pahayag sa senado.
Suno kay Lacson, apisar nga ginpahayag sang Department of Justice nga wala pa pormal nga ginbawi ni Alcantara ang iya mga nauna nga pahayag, paga-istoryahan sa gihapon ang posible nga silot kon i-retract ang ila ginsumpaan nga mga pahayag.
Ginklaro man sang senador nga paga-imbestigaran sang senado kon bala nagsumiter sang counter affidavit ang mga anay opisyal sang DPWH, kag ginpanindugan nga mas mabug-at ang ila atubangon nga silot kon mapamatud-an nga ginbawi nila ang ila testimonya.
Pahayag pa ni Lacson nga magapadayon ang imbestigasyon bisan pa nga mag-atras ang mga testigo bangud may iban pa nga ebidensya kaangay sang money trail nga sarang magamit sang DOJ ukon sang Ombudsman sa pagtumod sang mga involved sa mga proyekto.
Samtang, ginakonsiderar man sang komitiba ang pag-imbitar kay Batangas 1st District Representative Leandro Leviste may kaangtanan sa ginatawag nga “Cabral files.”
