Ginpanindugan ni Senate President Pro Tempore Panfilo Lacson nga bidensya, kag indi ang gahod ang magapanabat sa mga involved sa ginaalegar korapsyon sa mga flood control projects.
Samtang nagapadayon ang hearing sang Senate Blue Ribbon Committee, ginpakamalaut ni Lacson ang mga nagatublag kag nagakwestyon sa imbestigasyon, nga nagasiling nga ang magahod nga mga pahayag indi makabulig sa pagpakulong sa mga responsable.
Ginhatagan pagtamod sang senador nga sa idalum sang committee hearings, nabuyagyag ang malapnagon kag sistematiko nga pag-abuso sa pundo sang publiko nga nagadalahig sang mga matag-as nga opisyal sa executive kag legislative branches, subong man ang pila ka mga pribado nga kontraktor.
Suno pa kay Lacson, may mga kaso nga ginpasaka sa Sandiganbayan kag sa iban pa nga mga korte, samtang ang iban ang gina-imbestigaran sang Office of the Ombudsman kag sang Department of Justice. Kon sa diin indi magnubo sa 21 bilyon pesos ang mga bank account kag propiedad ang gin-freeze kag ang pila ka mga personalidad nagpasugot man nga magkooperar sa gobyerno.
Pahayag pa niya, ginbuyagyag man sang hearing ang mga conflicts of interest sa Philippine Contractors Accreditation Board (PCAB), ang pagbuyagyag sang mga blacklisted companies sa idalom sang bag-o nga ngalan, kag ang paghatag sang dalagko nga kontrata sa mga kumpaniya nga kulang sa kapital.
Ginpasalig ni Lacson nga sundon sang komitiba ang mga ebidensya kun sa diin man ini padulong, kag wala sang may ginaprotektahan ukon ginatumod sa nagapadayon nga imbestigasyon.
