TAPAZ, CAPIZ – Patay ang 75-anyos nga tigulang matapos ginapahayag ginhanot sang ikog-pagi sang iya nakaaway nga kasimaryo sa Sitio Kiryo, Barangay Switch, Tapaz, Capiz.
Ang biktima nga senior citizen amo si alyas “Bena”, biyuda, tumandok sang Brgy. Bag-ong Barrio, Tapaz, Capiz, apang temporaryo nga nagaistar sa Sitio Kiryo, Barangay Switch sa amo nga banwa samtang ang suspek amo si alyas “Lina”, isa ka laborer nga residente man sang Sitio Kiryo.
Sa impormasyon nga nagikan sa Tapaz Municipal Police Station, samtang nagapanglimpyo si Bena sa balay sang iya nga hinablos nga si alyas “Eena”, nag-abot ang suspek nga si “Lina” kag ginpahayag nga nag-angkon sang pagbinaisay sa tunga sang duha nga nagresulta sa pisikal nga pagsakitanay.
Sandig naman sa panaysayon ni “Liz” nga anak sang biktima, gintinguhaan niya pa nga tambagan ang duha sa diin ginhanot sang suspek ang iya iloy gamit ang stingray ukon ikog-pagi nga rason sang pagkalipong sang iya iloy.
Gindala sang mga himata ang biktima sa Tapaz District Hospital apang gindeklarar ini nga dead on arrival sang doktor bangud sa cardiac arrest.
Gilayon naman nga naaresto sang mga otoridad ang suspek sa ginpatigayon nga hot pursuit operation.
Sa karon, nagapabilin nga preso sa Tapaz PNP ang suspek kag nagapadayon ang imbestigasyon sang mga kapulisan angut sa nasambit nga insidente.
