TAPAZ CAPIZ – Pilas ang naangkon sang isa ka senior citizen, matapos ginapahayag ginluthang sang kaangay man nga senior citizen sa Barangay Daan-Banwa Tapaz, Capiz.
Sa interview sang Bombo Radyo sa imbestigador sang Tapaz Municipal Police Station nga si Police Chief Master Sergeant Rocer Garde, ginkilala ang biktima kay alyas “Pilo” 73-anyos kag residente sang nasambit nga barangay.
Samtang ang ginapahayag suspek ang ginkilala kay alyas “Efren”, 69-anyos kag residente naman sang Sitio Sibaguan, Barangay Initan sa nasambit nga banwa.
Suno kay Garde, sang natabo ang insidente yara sa iya talamnan ang biktima kag hinali lamang ini nga ginluthang sang suspek gamit ang 12 gauge homemade shotgun nga armas luthang.
Bangud sini, nag-angkon sang pilas sa tuo nga butkon kag ilok ang biktima nga madasig naman ginpadangat sa ospital para sa nagakaigo nga pagbulong.
Mahibaluan nga daan nga hiligut-anon ang ginalantaw nga motibo sang kapulisan angut sa nagluntad nga insidente.
Sa karon, yara na sa kustodiya sang Tapaz MPS ang suspek para sa nagakaigo nga disposisyon kag yara naman sa istable nga kondisyon ang nasambit nga biktima.
