Ginpataas sang Philippine Atmospheric, Geophysical and Astronomical Services Administration (PAGASA) ang Tropical Cyclone Wind Signal No.5 sa anum ka mga lugar sa pungsod samtang padayon nga nagabaskog kag nagapalapit ang Super Typhoon Uwan sa duta nga nagapamahog subong sa Aurora kag Polillo Islands.
Sa pinakaulihi nga report sang PAGASA pasado alas 5 sang hapon ang Signal No. 5 ginpataas sa masunod nga mga lugar:
Southern part sang Quirino
Nueva Vizcaya
Nueva Ecija
Aurora
Polillo Islands
Northern part sang Camarines Norte, kalakip na ang Calaguas Islands
Samtang (20) ka mga lugar ang yara sa idalum sang Signal No. 4, lakip na ang mga bahin sang Isabela, Nueva Vizcaya, Benguet, Aurora, Nueva Ecija, Pangasinan, Quezon, kag mga probinsya sa Bicol Region.
Signal No.3 ginapataas man sa daku nga bahin sang Luzon, lakip ang Metro Manila, kag pila ka mga lugar sa Visayas kag Mindanao, pareho sang Cebu, Iloilo, Negros Occidental, kag Surigao del Norte.
Ulihi nga nasiplatan ang mata sang Bagyo Uwan 110 kilometros norte sang Daet, Camarines Norte ukon 150 kilometros east-northeast sang Infanta, Quezon.
Nagapa-pack ini sang maximum sustained winds nga 185 kilometros por ora kag gustiness nga tubtob 230 kilometros por ora, samtang nagahulag pa-west-northwest sa kadasigon nga 30 kilometros por ora.
Ginalauman nga maga-landfall ang Super Typhoon Uwan sa Aurora subong nga gab-i ukon kaagahon sang Lunes, Nobyembre 10, kag magatabok sa kabukiran sang Northern Luzon, sa diin amat-amat ini nga magahuyang apang magapabilin nga isa ka bagyo.
Nagpaandam man ang PAGASA sa mabaskog nga storm surges nga mahimo maglab-ot sa masobra tatlo ka metros, ilabi na sa mga manubo nga baybayon sang Luzon, Visayas, kag pila ka bahin sang Mindanao.
