ROXAS CITY – Nagbalik na ang operasyon sang San Pedro Calungsod mission station sa Barangay Mianay, Sigma, Capiz matapos ang pagkawat sa tabernakulo sang wala pa nakilala nga mga suspek.
Sa interview sang Bombo Radyo Roxas kay Father Jose Arturo Emilio Arbatin, spokesperson sang Archdiocese of Capiz, ginpahayag sini nga matapos ang pila ka adlaw nga wala pagpatigayon sang misa sa nasambit nga chapel, personal nga ginpangunahan ni Monsignor Jose Advincula, arsobispo sang Archdiocese of Capiz ang isa ka misa kag naghalad sang pangamuyo bilang paghatag sang respeto sa puluy-an sang Diyos.
Apang agud indi na masulit ang insedente, nadesisyunan sang Simbahan nga dalhon sa kumbento ang santisimo ukon ostiya nga yara sa sulod sang tabernakulo tagsa ka gab-i.
Samtang nagapati si Arbatin nga pagpanagwat ang motibo sang mga suspek bangud naka-lock ang pirtahan sang Simbahan apang ginlagare sang mga suspek ang padlock nga patimaan lamang nga intensyon nila nga magsulod kag magpangawat.
