PANITAN, CAPIZ – Gin-athag sang SK Chairman sang Barangay Cabangahan, Panitan, Capiz ang alegasyon nga nagpanumbag ini sa lima ka mga menor de edad.
Sa interview sang Bombo Radyo kay alyas Mark, 21-anyos, SK chairman sang nasambit nga Barangay, ginpahayag sini nga indi siya ang nag-una sa pagpatupa sang inumol sa lima ka mga kabataan.
Suno kay Mark nga nagpanilong ini sa waiting shed kaupod ang iya pakaisa kag didto niya nakita-an ang lima ka mga menor de edad nga nagahampang sang online games samtang nagainom sang makahulubog nga ilimnon.
Pahayag sini nga tuyo niya lang kuntani nga sawayon ang lima ka mga kabataan kag bilang isa ka opisyal sang barangay, aminado ini nga wala siya nanamian sa ginsabat sa iya sang mga kabataan.
Gin-ako man sang SK Chairman nga yara siya sa impluwensya sang makahulubog nga ilimnon kag sang nakit-an sini nga nagapalapit ang bata sang kapitan halin sa balay, ginpalapitan niya ini apang ginpulihan na siya sang lima ka mga kabataan.
Nagapangayo sa karon sang pasaylo si alyas Mark sa lima ka mga kabataan kag natalana ang mga ini nga mag-settle sa Barangay.
