DUMALAG, CAPIZ- Gin-athag ni Ervyn Famucol Valencia ang nasambit nga SK Chairman sang Brgy. San Agustin, Dumalag, Capiz ang mga reklamo nga ginpa-bombo batok sa iya.
Sa interview sang Bombo Radyo, ginpahayag ni Valencia nga ang rason sang pagka-delay sang pa-liga sa ila nga barangay bangud nga wala pa sila sang referee nga nakita.
Dugang pa sini, ang pondo nga ginapangita sa iya ang nagabalor lang suno sa iya sang P280,000 sa diin para sa iya indi bastante agud makapatukod sang madamo nga proyekto sa ila nga barangay.
May yara naman suno sya sang mga proyekto apang kaangay nga indi ini nagakabatyagan sang pila ka mga kabataan sa ila nga lugar. Hugot man sini nga ginsiling nga wala siya sang may ginakumkom nga budget para sa mga aktibidad kag proyekto sa mga kabataan.
Samtang, panawagan sini sa mga tawo nga may luyag nga magreklamo may kaangtanan sa iya nga pagpanerbisyo, I-deretso lang suno sa iya kag indi na pag-ipalab-ot pa sa kun kay sin-o.
With a report from Bombo Jessa Mae De Los Santos
