ROXAS CITY — Ginpasakaan na sang reklamo nga murder gamit ang indi lisensiyado nga armas sa piskalya si PFC Sargie Labao nga suspek sa pagtiro-patay sa iya kaupod nga si PFC Delio Sebarillo sa mismo kampo sang 61st Infantry Battalion, Philippine Army sa Barangay Lagdungan, Tapaz, Capiz.
Ginpresentar sang mga katapu sang Tapaz Municipal Police Station si Labao sa Provincial Prosecutor’s Office sa Roxas City Hall of Justice kaina sang aga sa diin ini ginpasakaan sang reklamo.
Kaupod ni Labao ang iya nga asawa kag pila ka mga himata samtang nagtambong man ang nabilin nga asawa ni Sebarillo.
Apang nagpamalibad nga maghatag sang pahayag si Ginang Sebarillo sang ginpangayuan ini sang pahayag sang Bombo Radyo.
Ginpahayag naman sa Bombo Radyo ni SPO3 Joseph Gallenero, imbestigador sang Tapaz PNP, nga nakaestorya na nila ang suspetsado humalin nga bisitahon ini sang iya asawa kaupod ang ila anak.
Apang ba-se sa ila nga obserbasyon, indi mahim-us si Labao sa sulod sang bilangguan.
Magapabilin sa kustodiya sang Tapaz PNP si Labao kag ginpasiguro ni Gallenero nga hugot nila nga ginabantayan ang soldado labi na kag nahibaluan nila nga na-diagnose ini nga nagasuprer sang psychotic disorder.
Suno kay Gallenero, ginpamilit pa ni Labao sa iya nga abogado sa Public Attorneys Office nga buhi pa ang iya nga kaupod bangud may suksok ini nga bulletproof vest.
