ROXAS CITY – Tatlo ka beses nga ginbuno sa likod ang 19 anyos nga lalaki, nga nagikan sa binaylehan sa Barangay Rizal, banwa sang Pontevedra, kaina sang kaaganhon, Hunyo 14.
Ginkilala ang biktima kay Christian Villanueva, Grade 10 student kag residente sang Brgy. Agbanog, sa amu man nga banwa.
Sandig sa inisyal nga imbestigasyon nga nakuha sang Bombo Radyo sa Pontevedra MPS, nga samtang nagalakat ang biktima nagikan sa binaylehan, hinali ini nga ginbuno-patalikod sang makatatlo ka beses sang suspek nga gintawag kay alyas “Raden” nga ginapatihan ginbantayan ang paglabay sang biktima sa lugar.
Madasig man nga nagpalagyo ang suspek sa wala mahibaluan nga direksyon.
Samtang ginpadangat sa Bailan District Hospital ang nasambit nga biktima.
Sa karon, padayon ang pag-ayam sang mga kapulisan sa suspek.
