ROXAS CITY – Natalana nga pasakaan sang panumbungon nga paglapas sa Republic Act 10591 ukon Comprehensive Law of Firearms and Ammunition ang 24-anyos nga persona nga boluntaryo nagsungka sang iya armas luthang sa estasyon sang Bombo Radyo Roxas, Broadcast Center sa Arnaldo Boulevard, Roxas City.
Ang nasambit nga persona amo si Noriel Lacuarta, 24 anyos sang Barangay Bula, Mambusao, Capiz.
Matandaan, nga nagpanawag sang kapulisan ang Bombo Radyo kag ginkustodiya sa Roxas City PNP ang nasambit nga indibidwal kag ang iya nga armas-luthang nga isa ka pistolized homemade nga armas.
Sang gin-usisa ang nasambit nga persona, nagtuad ini nga una siya nga nagpadulong sa Barangay Baybay kag didto suno sa iya tuyo kuntani niya nga luthangon ang isa ka foreigner.
Nahibaluan nga yara sa idalom sang impluwensya sang makahulubog nga ilimnon si Lacuarta.
Sa karon, nakahunong na sa karsel sang Roxas City Police Station ang nasambit nga persona.
