ROXAS CITY — Dead on arrival sa ospital ang 18-anyos nga soltero nga nagamaneho sang motorsiklo matapos magsampok sa isa pa ka motorsiklo nga ginamaneho sang Sangguniang Bayan member sa Barangay Poblacion, Tapaz, Capiz.
Ginkilala ang biktima nga si Edmel John Febre, residente sang Barangay San Antonio sa amo man nga banwa.
Base sa imbestigasyon sang Tapaz PNP, ginamaneho ni Febre ang iya motorsiklo angkas ang abyan nga si Christian Vigo, 16-anyos.
Ginapahayag nga nagpang-agaw sang linya sang karsada si Febre rasun nga nagsampok ini sa kasugata nga motorsiklo nga ginamaneho ni SB member Hernani Pio, 57-anyos sang Barangay Poblacion, Tapaz nga angkas man ang tiayon nga si Mary Jane Pio, 46-anyos.
Gilayon nga gindala sa Tapaz District Hospital ang mag-abyan apang gindeklarar nga dead on arrival si Febre.
Samtang padayon pa nga ginadapatan sang pagbulong sa isa ka private hospital sa siyudad sang Roxas ang mag-asawa nga Pio.
