Naglawig sa masobra isa ka oras ang ika-apat nga State of the Nation Address ni Presidente Ferdinand Marcos Jr. kahapon nga adlaw, Hulyo 28, 2025.
Nag-umpisa ang pag-deliver sang speech sang Presidente ‘las-kwatro sais sang hapon kag natapos ‘las-singko dies y siete sang hapon.
Nagkalain-lain nga mga topiko ang ginhatagan igtalupangod ni Presidente Marcos.
Sa isyu sang bugas, ginpaandaman ni Presidente Marcos ang mga traders nga naga-manipula sang presyo. Nagpasiguro ini nga lagson sang gobyerno ang sin-o man nga madakpan.
Sa isyu sang edukasyon, nagpasalig si Presidente Marcos nga magapatukod ang gobyerno sang 40, 000 classrooms sa mga eskwelahan antes magtakop ang iya termino. Nagpalabtik pa ini sa Duterte administration may kaangtanan sa maanomaliya nga pagbakal sang laptops sa mga manunudlo. Suno sa Presidente, ginasiguro niya nga mapaidalom sa insakto nga proseso ang pagbakal sang Marcos’s administration sa mga laptops para sa mga manunudlo.
Sa isyu sang ikaayong lawas, mangin libre ang mga bulong para sa naga-dialysis,kag libre man ang dialysis sa bilog nga tuig sa idalom sang Philippine Health Insurance Corporation. Suno sa iya, sabton man sang PhilHealth ang galastuhon sang mga pasyente nga nagakinahanglan sang kidney transplant. Sakop man sang PhilHealth ang heart attack kag open-heart surgery.
Sa isyu sang tubig, ginpahayag ni President Marcos nga madamo sang nabaton nga reklamo ang gobyerno nga wala sang may nagatubod nga tubig sa gripo sang mga konsumidor. Naglab-ot sa anum ka milyon nga mga consumers sa pungsod ang apektado. Nagpasalig ang Presidente nga may yara sang salabton ang mga responable sa kakulang sang supply sang tubig sa pilipinas.
Naghirinugyaw naman ang mga tumalambong sa sulod sang Batasang Pambansa Complex matapos ginmensyonar ni Presidente Marcos si PNP Chief General Nicolas Torre III nga amo ang bag-o nga kampeonato sa patag sang sports. Matandaan nga winner by default si General Torre sa Charity boxing match nga ginhiwat sang Dominggo Hulyo 27, 2025 matapos nga no show si Acting davao City Mayor Baste Duterte nga una nga nahangkat sang sumbaganay batuk sa PNP Chief.
Sa isyu sang missing nga mga manugbulang, ginpaandaman ni Presidente Marcos ang mga yara sa likod sang krimen nga lagson sang gobyerno kag manabat ang mga ini — sibilyan man ukon opisyal. Matandaan nga gintumod sang whistleblower ang negosyante nga si Atong Ang nga amo ang utok sang pagkadula sang mga manugbulang.
Nagtaas naman ang tingog ni Presidente Marcos sa mga kurap nga opisyal snag gobyerno may kaangtanan sa mga flood control projects nga wala napuslan bangud ginbaha sa gihapon ang madamu nga parte sang pungsod kasunod sang pag-igo sang bagyo Crising, bagyo dante, bagyo emong kag dala sang habagat. Suno sa Prewsidente, mahuya man ang mga kurap nga nagapangawat snag kuwarta sang publiko para sa ila kaugalingon nga interest.
Bangud sini nagmando ang Presidente sa Department of Public Works and Highways nga gilayon nga magpasa sang listahan sang tanan nga mga flood control projects sa kada rehiyon nga naumpisahan na kag nakumpleto sa sulod sang tatlo ka tuig. Ang Regional Project Monitoring Committee ang magausisa sang mga listahan sang proyekto kag magahatag sang report sa mga failed projects, mga wala pa natapos kag ang mga ginaalegar ghost projects.
