ROXAS CITY – Bali ang tuo nga tiil sang isa ka Sr. Citizen matapos aksidente nga ginbunggan sang motorsiklo sa Roxas Ave., Roxas City.
Ginkilala ang biktima kay alyas “Danilo”, 65-anyos, traysikol driver, kag residente sang Barangay Cagay, sining syudad samtang ang ginatudlo nga nakabunggo ang ginkilala kay alyas “Anthony”, 17-anyos kag residente sa banwa sang Panay kag angkas sini nga ginkilala kay alyas “Jacob”, 17-anyos, kag residente naman sa syudad sang Roxas.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang ginasubay sang motorsiklo ang dalan padulong sa Roxas Avenue, hinali lamang nga nabungguan sini ang nagaparada nga traysikol.
Bangud sa impact, nag-angkon sang pilas ang angkas sang menor de edad.
Gilayon naman ginrespondehan sang katapo sang Roxas City Emergency Response Team ang lugar agud hatagan sang pauna nga pagbulong ang mga nagkalapilasan.
Suno sa mga nakasaksi sa aksidente, madasig ang pagpadalagan sang driver sang motorsiklo kag ginaalegar yara ini sa impluwensya sang makahulubog nga ilimnon rason nga nadulaan sang kontrol sa iya pagmaneho.
Sa karon, padayon ang imbestigasyon sang mga kapulisan angut sa nasambit nga insidente.
