Gindeklara na ang state of calamity sa pila ka lugar sa Pilipinas bangud sa paglaslas sang bagyo nga Crising kag habagat.
Nagresulta ang nasambit nga mga kalamidad sang tuman nga pagbaha nga nagtuga naman sa pagka-displace sang madamo nga mga residente.
Sa Metro Manila, ginpaidalom na sa state of calamity ang Quezon City kag Malabon City nga tuman nga gin-igo sang mga pagbaha.
Samtang nakatalana naman nga pormal nga ideklara ang state of calamity sa Manila City posible subong nga adlaw matapos ginkumpirma kahapon ni Mayor Isko Moreno nga kinhanglan nga ideklara ini sa nasambit nga siyudad.
Sa Ilocos Region naman, gindeklara naman ang state of calamity sa banwa sang Umingan sa probinsya sang Pangasinan matapos ma-displace ang masobra 6,000 nga pamilya bangud sa mga kalamidad subong man sa banwa sang Malasiqui.
Ginpaidalom naman sa state of calamity sa Calumpit, Bulacan, bug-os nga probinsya sang Cavite, Sebaste sa Antique kag sa Cebu City.
Ang deklarasyon sang state of calamity ang nagahatag-ligwa sa lokal nga gobyerno para madasig nga ma-access ang ila nga emergency fund kag magpatuman sang mga relief operations agud mabuligan ang mga na-displace nga residente.
Pahanugutan man sang deklarasyon ang mga LGUs nga magpatuman sang price freeze sa mga nagapanguna nga balaklon.
