DUMARAO CAPIZ – Ginapahayag nga anay target sang “Oplan Tokhang” sadtong tinalikdan nga administrasyon ang ginakabig subject person sa ginpatigayon nga drug buybust operation sa Poblacion Ilawod, Dumarao Capiz.
Matandaan nga natigayon nga madakpan sanday alyas ‘Mac’, 47-anyos, ginakabig High Value Individuals (HVIs) kag subeject person sa amu nga operasyon kag alyas ‘Allan’, 59-anyos nga lunsay mga residente sang nasambit nga lugar.
Sa interview sang Bombo Radyo sa Leader sang Provincial Drug Enforcement Unit (PDEU) nga si PCpt. Edgar Diaz, ginpahayag sini nga sadtong tinalikdan pa nga tuig nila ini ginapanikasog apang wala nagatinir sa isa ka lugar ang nasambit nga subject person.
Pinaagi sa gintingub nga pwersa sang Provincial Drug Enforcement Unit (PDEU) sang Capiz Police Provincial Office (CPPO) kag Dumarao PNP, natigayon nga madakpan sanday alyas “Mac” kag alyas “Allan”.
Mahibaluan nga nakuha paghinakop sang mga ini ang 10 tanan ka sachets sang ginapatihan illegal nga droga kung sa diin ginabulubanta may kabug-aton sang 45 gramos kag may standard drug price nga P306,000, P7,500.00 nga buybust money kag pila ka mga drug paraphernalia’s.
Kaso nga paglapas sa Republic Act 9165 ukon Comprehensive Dangerous Drugs Act of 2002, ang paga-atubangon sang mga nagkaladakpan.
Suno kay Diaz, nga magpakaisa ang nasambit nga mga persona.
Sa karon, nagapabilin ang mga ini nga nakahunong sa karsel sang Dumarao MPS para sa nagakaigo nga disposisyon.
