ROXAS CITY, CAPIZ- Ginkumpirmar sang barangay kapitan sang Barangay Banica, Roxas City nga ang subject person sa ginpatigayon nga search warrant implementation sang mga katapo sang 1st Capiz Provincial Mobile Force Company, Philippine Drug Enforcement Agency (PDEA) kag Provincial Drug Enforcement Unit (PDEU) ang yara sa Barangay Anti-Drug Abuse Council (BADAC) watchlist.
Ang arestado amo si alyas ‘Cobra’, 22-anyos kag residente sang nasambit nga lugar.
Sa interview sang Bombo Radyo kay Punong Barangay Mike Xander Agrasada, sang nasambit nga barangay, iya ginpahayag nga madugay na nga gina-monitor sang BADAC ang amo nga lalaki bangud nga madamo man sang mga ginapalab-ot nga report sa ila nga talatapan sa diin ginapahayag nga nagapatigayon ini sang mga ilegal nga aktibidad sa ila nga barangay.
Dugang pa sini, si alyas ‘Cobra’ ang ginpahayag man nga nagagamit sang ilegal nga droga.
Nakuha sa paghinakop sang subject person ang 38 ka sachets sang ginapatihan shabu nga nagabug-at sang 190 gramos kag nagabalor sang P1,290,000, drug paraphernalias kag walo ka mga bala sang armas-luthang.
Samtang, nagapangatubang ini sa kaso sa paglapas sa Republic Act 9165 ukon ‘Comprehensive Dangerous Drugs Act of 2002’.
Sa karon, yara na ini sa kustodiya sang Roxas City Police Station para sa nagakaigo nga disposisyon.
With a report from Bombo Sunnie Mae Batencila
