ROXAS CITY – Bastante ang suplay sang itlog sa probinsya sang Capiz mangin sa bug-os nga Western Visayas.
Ini ang ginpahayag ni Mr. Ian Adonay, Sales Manager sang CALS Poultry Supply sang mainterview sang Bombo Radyo.
Suno diri, ba-se sa ila assessment kag sang iban pa nga producers sang itlog, bastante ang suplay diri sa probinsya mangin sa bug-os nga rehiyon VI.
Mahibaluan nga ang CALS poultry supply ang isa sa pinakadako nga supplier sang itlog diri sa syudad sang Roxas kag probinsya sang Capiz kun sa diin nagasuplay man sila sa probinsya sang Aklan, Iloilo, kag Antique.
Ginpakigbahin man ni Adonay ang ila wholesale price subong sang kada sizes sang itlog kun sa diin ang small ang may presyo nga P5.90, medium P6.40, large P6.70, XL P6.90, kag ang jumbo P7.03.
Nagadepende naman suno diri sa retailer nga nagabaligya sa merkado ukon tiangge kun pila ila ipatong bangud ginaba-se man nila ang ila mangin ginansya sa ila expenses kasubong sang renta kag iban pa.
Dugang sini, nagpasaka sila sa presyo sang itlog nagligad nga semana sang 20-40 centavos kada itlog bangud ang raw materials kasubong sang mais, coconut oil, trigo, palm oil, kag soya nga ginabutang sa feeds ang nagtalaas.
Ginpanginwala man ni Adonay nga magalab-ot sa P15 ang presyo sang itlog diri sa probinsya kag malayo ini nga matabo.
Sa pihak nga bahin, P180 naman ang kada kilo sang ila manok anuman ang kadakuon kag P2 lamang ang gintaas sini sang nakaligad nga 2 ka semana kun sa diin posible magtaas pa kun magsaka man ang raw materials nga ginabutang sa feeds.
Nagapasalamat si Adonay bangud wala naapektohan sang bird flu ang probinsya bangud man sa pagpanikasog kag pagprotekta sang Department of Agriculture-Capiz.
