Nagapabilin nga bastante ang supply sang gasolina, kerosene kag diesel sa tanan nga mga gas stations sa Roxas City, Capiz kasunod sang nagalala nga tensyon sa Middle East.
Sa pagpakig-angot sang Bombo Radyo sa mga tiglawas sang gas stations, ila ginpahayag nga wala pa naman sa subong sang kakulangan sa supply sang amo nga produkto sa pihak sang pagpanghangkat sa pagkalibutanon nga merkado bangud sa kinagamo nga nagakatabo sa tunga sang Iran kag Israel kag Estados Unidos sang Amerika.
Dugang pa nila, ang presyo sang mga gatong nagsaka sang gamay kasunod sang weekly nga paghulag sini sa merkado.
Nagabantay naman sila sa mando sang natungdan nga mga ahensya may kaangtanan sa pagpasaka sang presyo sang amo nga produkto.
Nahibaluan nga ginalantaw sang gobyerno ang posible nga pagsaka sang presyo sang gatong sa P7 tubtob P10 sa kada litro kun magpadayon ang amo nga kinagamo sa Middle East.
