ROXAS CITY – Madugay na nga ginamonitor sang mga awtoridad ang suspek nga nadakpan sa ginkasa nga drug buy-bust operation sa Sitio Redland, Brgy. Pob. Elizalde banwa sang President Roxas.
Ini ang ginkumpirmar ni Agent Alvin Clemente, sang Philippine Drug Enforcement Agency (PDEA) Capiz sang ma-interview sang Bombo Radyo.
Suno kay Clemente, nga takna 1:40 kahapon sang hapon sang nagpatigayon sila sang drug buy-bust operation sa nasambit nga lugar kaupod ang President Roxas PNP kun sa diin natigayon nila nga madakpan ang suspek nga ginkilala kay Brian Miguel Estores nga isa sa regional target-list sang PDEA region 6.
Ginpahayag sini, nga pila man ka bulan ang ila monitoring sa nasambit nga suspek kag ginatinguhaan nga maaresto apang ini ang madasig nga makamutik sang ila operasyon.
Natigayon nga madakpan kahapon ang suspek pinaagi sa isa ka asset nga nakabakal sa iya sang iligal nga droga.
Base sa ila monitoring, madamo na nga mga lugar ang ginapadulungan ni Estores sa pila ka mga probinsya sa rehiyon 6 agud magpatigayon sang iya iligal nga transaksyon.
Matandaan, narekober sa posisyon ni Estores ang 9 ka sachet sang ginapatihan shabu nga ginabulubanta nagabug-at sang 10 tubtob 15 gramos, buy-bust money nga P5,000 kag 1 coin purse.
Ginabulubanta naman nga yara sa mas o menus P70,000 ang street value sang kwarta ang nakumpiskar sa nasambit nga suspetsado.
Mahibaluan nga anay drug surrenderee na sa ila barangay si Estores.
Magapangatubang ini sang kaso nga paglapas sa R.A 9165 ukon Comprehensive Dangerous Drugs Act of 2022.
Sa karun, yara ini sa kustodiya sa President Roxas PNP para sa nagakaigo nga disposisyon.
