ROXAS CITY – Nagapabilin sa karsel sang Jamindan Municipal Police Station ang 45-anyos nga suspek nga nagpanglabo kag nagpangbuno sa 4 ka miyembro sang pamilya sa Sitio Agsasalong, Brgy. Lucero banwa sang Jamindan.
Matandaan nga ginkilala ang mga nagkalapilasan nga sanday, Lanela Villeza, 73 – anyos, kag mga kabataan sini nga sanday, Roger Villeza, 47 anyos, Richard Villeza, 46 anyos kag Ruel Villeza lunsay mga mangunguma kag residente sang nasambit nga barangay.
Samtang ang suspetsado ang ginkilala naman kay Rico Villeza, 45 anyos, himata man sang mga biktima kag ginaalegar may deperensya sa paminsaron.
Sandig sa Jamindan MPS, nga wala na sang plano nga magpasaka sang kaso ang mga biktima batuk sa suspek bangud nahibaluan naman nila nga ini ang alabuton rason nga nahimo sini nga magpanglabo kag magpangbuno.
Mahibaluan, nga samtang naga-inom inom ang nasambit nga mag-ulutod hinali nalang nag-abot ang suspek kag ginpanglabo kag ginpang-buno ang mga ini nga nag resulta sang ila kapilasan sa lawas kun sa diin gintambagan ini sang iloy sang mag-ulutod apang nadalahig ini nga ginlabo kag nag-angkon man sang pilas sa iya kamot.
Apang, suno sa suspek nga nabatian niya nga naga-ilinaway ang mag-utod gani iya gintambagan apang wala ang mga ini nagpalamati rason nga iya ini ginpanglabo kag ginpangbuno agud mag-untat.
Sa karun, ang mga biktima nga lunsay ginpadangat sa Mambusao District Hospital ang yara na sa estable nga kundisyon.
Samtang, natalana naman nga igahilway ang suspetsado matapos nga magtakop ang iya reglementary period of detention.
