ROXAS CITY- Nagapabilin nga at large ang suspek nga si Junrey Basquez nga amu ang responsable sa pagpangluthang sa mag-ulutod nga mangunguma sa Barangay Sta. Fe, Pilar, Capiz takna 11:20 sang gab-i sang Oktubre 17.
Ini ang ginkumpirmar ni PCPL. Herbert Dela Vega, imbestigador sang Pilar MPS sang mapakig-angutan sang Bombo Radyo.
Matandaan dead on arrival sa ospital ang biktima nga si Hadjade Dela Vega Bernat 24-anyos, samtang pilason naman ang utod sini sa iloy nga si Uldarico dela Vega Alapane, 26-anyos.
Suno sa imbestigador, wala sang daan nga hiligut-anon ang suspek kag mga biktima gani ginalantaw nila nga rason sang krimen bangud lunsay yara ang mga ini sa impluwensiya sang makahulubog nga ilimnon kun sa diin sang mga hubog na, didto kag nagpatunga ang indi pag-intindihanay.
Ginapahayag matapos ang komosyon, nag-una pauli si Basquez kag nagsiling nga mabalik pa ini, apang wala magdugay nagdesider ang mag-utod nga si Bernat kag Alapane nga magpauli naman.
Ginaalegar ginhulat sang suspek ang mga biktima kag didto ginbanggaan kag gin-una luthang sang makaduwa ka beses si Alapane nga na-igo sa natuo nga likod kag paa, apang nakadalagan ini kag nakapanago.
Samtang wala naman nakapalagyo si Bernat rason nga napurohan ini sang ginluthang sang makatatlo ka beses sa magkatuhay nga parte sang iya kalawasan nga gintunaan sang iya kamatayon.
Nagapadayon suno diri ang hot pursuit operation sang kapulisan sa suspek nga gilayon nagpalagyo matapos ang insidente.
Ginapanugyan sang kapulisan sa pamilya nga magpasaka sang kaso batuk sa suspek nga posible magapangatubang sa kaso nga murder kag frustrated murder.
Padayon man nga ginabulong si Alapane sa ospital samtang ginahitsu na sang pamilya ang bangkay ni Bernat.
