ROXAS CITY- Padayon pa sa karon ang hot pursuit operation sang mga kapulisan sa ginatumod suspek sa pagluthang patay sa isa ka lalaki sa Barangay East Villaflores, Maayon, Capiz.
Matandaan nga ginkilala ang biktima nga si Mark Dordas, 33-anyos samtang ang ginatudlo suspek ang ginkilala nga si Jonel Carillo, 34-anyos, negosyante lunsay residente sang nasambit nga lugar.
Sa interview sang Bombo Radyo kay PMAJ. Syril Punzalan, Chief of Police sang Maayon PNP, ginpahayag sini nga ang biktima ang nagasupreher sang balatian sa paghuna-huna kag may maintenance ini nga bulong nga dapat imnon apang wala ini gina-inom.
Ini nga balatian ang nagsugod pa sang tuig 2019 , kag sandig pa imbestigasyon sang kapulisan, anay na nakapatay ang amo nga biktima kag amo ang iya kaugalingon nga amay pinaagi sa paglampos sang matig-a nga bagay sa ulo kag anay na nga napreso apang nakaguha man ini gilayon bangud wala na nagpursige pa ang pamilya sa pagpasaka sang kaso.
Antes paman nahitabo ang pagpangluthang , ginpahayag nga magasulod kun tani ang suspetsado kag ang iya bayaw sini sa ila balay apang hinali nga gintrangkahan sang biktima.
Natigayon man nga nakasulod ang mga ini bangud yara sa sulod ang utod man sang suspek, apang hinali nga ginlampusan sang biktima ang iya utod (bana sang utod sang suspek) sang matig-a nga bagay.
Bangud sa kaakig sang suspek didto kag nagkuha ini sang armas luthang kag gintadtad sang bala ang biktima gamit ang ginaalegar calibre 45 nga armas-luthang sa nagkalain-lain nga parte sang lawas sang biktima.
Samtang, ginpahayag nga yara sa impluwensya sang makahulubog nga ilimnon ang suspetsado.
Madasig man nga nagpalagyo sa lugar ang suspek matapos makumiter ang krimen.
Gilayon man nga ginpadangat sa ospital ang biktima apang gindeklarar ini nga dead on arrival.
Sa karon, padayon pa ang imbestigasyon sang mga kapulisan angut sa insidente.//
