ROXAS CITY – Ginpasakupan sang madamo nga mga NBA fans ang symbolic memorial service sang Brotherhood of Capiz Riders sa Roxas City Public Plaza kagab-i bilang pagpakita sang ila pagpakig-simpatiya sa nagtaliwan nga ginbansagan The Black Mamba Kobe Bryant.
Ginpasalamatan ni Pastor Russel Monton Ban, founder sang Brotherhood of Capiz Riders ang tanan nga nagpakig-upod sa ila sa nasambit nga kahiwatan kalakip si mayor Ronnie Dadivas.
Ginsuguran sang grupo sa pagpangamuyo ang aktibidad kag ginsundan sa paghatag sang mga mensahe, kag pagpirma sa tarpaulin nga ipadala sa Staples Center, Los Angeles, California.
Samtang malipayon nga gintuad ni Ban nga ginpuno sang mga Capizeño NBA fans sang pirma ang tarpaulin nga ila ginpreparar sa diin tanan nga nagtambong ang nagsulat sang ila mensahe para NBA Legend Kobe Bryant.
Nagapati ang grupo nga pinaagi sini mapakita ang ila nga pagpasalamat kag pagsuporta kay Bryant nga madamo sang natandog nga kabuhi.
Nagapanawagan si Ban sa mga Capizeño nga luyag pa magpirma sa tarpaulin para kay Bryant nga mahimo lamang sila nga makapadulong sa Barangay Hall sang Barangay 5, sining syudad sa sulod lamang sang isa ka semana.
Ini nga tarpaulin ang ipadala sa ila partner sa Staples Center sa California, agud mapakita ang pagpalangga sang mga taga Capiz sa The Black Mamba, Kobe Bryant.
May tema ang kahiwatan nga “Reflection on the Purpose of Life’’ nga tuyo handurawon ang values kag character ni Bryant nga nagtulod sa iya mga fans para palanggaon kag dumdumon ini.
