ROXAS CITY – Ginkumpirmar sang Acting Fire Marshal sang Bureau of Fire Protection Panit-an nga nagpakig-angut na sa ila talatapan ang tag-iya sang van nga may karga nga gasolina kag krudo nga nasunog sa national highway sang Poblacion Ilawod, Panit-an, Capiz sang damlag lang.
Sa interview sang Bombo Radyo kay SFO3 Ramel Arquisola, ginpahayag sini nga may nagtawag sa iya telepono kahapon nga adlaw, Abril 21, kag nagpamangkot kun mahimo na ma-claim sang iya ‘boss’ nga si Raymond Abapo, taga-syudad sang Roxas, ang nasunog nga salakyan.
Ginpanindugan ni Arquisola nga dapat magpadulong sa ila talatapan ang driver nga ginhingadlan kay Roel Dellava, sang syudad man sang Roxas, kag ang nasambit nga tag-iya agud makuhaan sang dugang nga statement kag mapangayuan sang nagakaigo nga permit sa pagtransport sang ginalon nga gatong.
Ginpanginwala man sang tag-iya sang van nga pang-negosyo ang purpose sang krudo kag gasolina bangud suno diri, pang-konsumo ang amu nga gatong para sa ila backhoe nga naga-operate sa Pontevedra, apang duda ang mga katapo sang bumbero sa nasambit nga rason.
Ginahibalo man sa karon sang mga katapo sang BFP Panit-an, kun sa diin nga gasoline station nagikan ang nasambit nga delivery van.
Sa tion nga wala sang mapakita nga permit kag mapamatud-an nga iligal ang amu nga transakyon, magapasaka sang nagakaigo nga panumbungon ang Panit-an fire Station batuk sa madalahig nga persona.//END
