ROXAS CITY – Padayon ang pagpaalinton sang alkalde sang Pilar sa iya pumuluyo nga maglikaw anay sa pagkaon, pagbaligya, pag-ani, kag pagbiyahe sang mga panginhason.
Sa interview sang Bombo Radyo kay Hon. Arnold Perez, Mayor sang Pilar, gintul-id sini nga samtang wala pa sang abiso gikan sa BFAR nga mahimo na magkaon sang panginhason, hugot ang iya pagpatuman sini sa iya banwa para sa kaayuhan sang tanan.
Masami suno diri nga nagamonitor ang BFAR sa mga coastal waters sandig sa ila nga protocol gani apisar partikular sa Barangay Natividad lang ang nagpositibo sa red tide, gindala niya nalang ang bug-os nga kabarangayan sa ila banwa.
Dugang pa sang alkalde nga maayo kag wala na nasundan ang mga nabalhag nga na food poison sang nagliligad nga senemana kun sa diin kalabanan mga kabataan.
Nakumpirmar man ni Mayor Perez nga red tide ang kabangdanan sang pagka-food poison sang kapin 10 ka mga biktima, apang yara naman ini tanan sa maayo nga kahimtangan.
Kalabanan suno diri sa mga manugpanginhas ang kababainhan kag mga mangingisda ang mga bana sang mqa ini, gani may ara sa gihapon sila sang pangabuy-anan.
Kaangut diri, may pila ka vendors ang nagpadulong na sa iya nga nagpangayo sang bulig.
Panugyan sang alkalde sa iya pumuluyo ilabi na ang mga yara sa coastal areas nga padayon nga sundon ang abiso sang gobyerno, samtang bukas naman ang iya talatapan agud magbulig sa mga shellfish vendors nga apektado sang wala gina-ekspektar nga hitabo.
