ROXAS CITY – Naghatag sang iya nga komento si Tapaz Mayor Roberto Nonong Palomar angut sa pagtuhaw sang iya nga pangalan nga isa sa ginaalegar nagpangtraidor rason nga nalutos ni governor – elect Esteban Nonoy Contreras si incumbent governor Antonio del Rosario sa pagka-gobernador sang probinsiya.
Sa interview sang Bombo Radyo, ginklaro ni Palomar nga wala siya sang may gin-endorso nga kandidato sa pagka-gobernador bangud pareho niya nga suod nga mga abyan sanday Del Rosario kag Contreras.
Apang suno kay Palomar nga antes pa man ang eleksiyon, kasubong nabatyagan na sini nga mas magapangibabaw si Contreras sa turnout sang boto sa amo nga banwa.
Ini bangud halos tatlo ka beses sa isa ka semana kun magbisita si Contreras sa amo nga banwa samtang si Del Rosario suno kay Palomar ang wala halos makabisita sa Tapaz.
Kun sinuman ang may mataas nga boto sa amo nga banwa suno kay Palomar, amo ini ang nahamut-an sang Tapaznon nga mangin ila gobernador.
Mahibaluan nga isa man ang Tapaz sa mga banwa kun sa diin nalutos ni Contreras si Del Rosario sa pagka-gobernador.
