ROXAS CITY, CAPIZ- Arestado ang tatlo ka mga indibidwal matapos nga nakuhaan sang ginapatihan iligal nga droga sa ginpatigayon nga drug buybust operation sang mga katapo sang Provincial Drug Enforcement Unit (PDEU) sang Capiz Police Provincial Office (CPPO) sa Barangay Dayao, Roxas City.
Ang mga arestado amo sanday alyas “Oliver”, 50-anyos, subject person, alyas “Cassandra”, 35-anyos, live-in partner, kag alyas “Antonio”, 55-anyos nga lunsay residente sang nasambit nga lugar.
Sa interview sang Bombo Radyo kay Punong Barangay Wennie Batuampo, sang amo nga lugar, iya ginpahayag nga madugay na nga ginaobserbaran ang amo nga indibidwal may kaangtanan sa iligal nga buluhaton kag sa amo nga kahigayunan, natigayon ini nga nagkaladakpan.
Nahibaluan nga pamaagi sa isa ka pulis nga nagpakuno-kuno poseur-buyer, nakuha ang isa (1) ka sachet sang ginapatihan shabu, kabaylo sang P15,000 nga buybust money. Dugang pa nga nakuha ang 14 ka sachets sang ginapatihan man nga shabu.
Sa kabug-osan, nagabug-at sang 75 gramos ang amo nga droga nga nakumpiskar sang mga otoridad sa diin nagabalor ini sang P510,000.
Nagapatubang ang mga ini sa kaso sa paglapas sa Republic Act 9165 ukon ang ‘Comprehensive Dangerous Drugs Act of 2002’.
Sa karon, yara na ini sa kustodiya sang Roxas City Police Station para sa nagakaigo nga disposisyon.
Interviewed by Bombo Sunnie Mae Batencila
