ROXAS CITY-Pilason ang tatlo ka mga persona kalakip ang isa ka babayi matapos na-aksidente sa motorsiklo nga ginasakyan sa Arnaldo Boulevard Barangay Baybay, Roxas City.
Ginkilala ang mga napilasan nga sanday Carl Bryan Aga-in, 29-anyos residente sang Barangay Mongpong sining siyudad, Joefrey Atinado, 23-anyos residente sang Barangay Talon, sining siyudad kag Carmina Arroyo, 33-anyos residente sang Rizal Street Barangay VII, sining siyudad.
Sandig sa inisyal nga imbestigasyon sang mga kapulisan nga samtang ginasubay sang tatlo ang dalan sakay sa motorsiklo, aksidente sini nga nabungguan ang ginasundan nga motorsiklo sakay ang wala matumod nga driver nga madasig nga nagpalagyo.
Bangud sini, nadulaan sang kontrol sa pagamaneho si Aga-in rasun nga tumba kag nagsaog ini sila sa dalan
Nag-angkon sang pilas sa magkatuhay nga porsyon sang kalawasan ang tatlo ka mga person nga gindala sa Roxas Memorial Provincial Hospital kag padayon pa nga ginabulong.
Nahibaluan nga yara sa impluwensiya sang makahulubog nga ilimnon ang tatlo ka mga biktima.
Samtang nagapadayon pa ang imbestigasyon sang mga kapulisan agud matumod ang driver sang isa pa ka motorsiklo.
